احدث محضـــــــــــــــ استلام ـــــــــــــــــــــــــــر

[ندعوك للتسجيل في المنتدى أو التعريف بنفسك لمعاينة هذه الصورة]

سيادة الباشا حبيب القلب تحية طيبة وبعد،
فى تمام اليوم الموافق ما أعرفش هو إيه، بس أهو يوم من أيام السنة وخلاص، قررت ما هو آت..
بص بقى.. الحب مش نظرة وإبتسامة، مش كلمة والسلامة، ده فيه حاجات كتير قوى عشان أحبك يا سيادة، الحبيب لو ناوى تحبنى.
زوووووم بقى على الحاجات اللي هتعملها عشان تنول شرف لقب حبيب القلب، وتكون مش بس زوجى المصون، ولا وكمان حبيبى وأخويا وأبويا وصديقى، وتفضل مأنتخ طول العمر جوّه القلب، ولما ربنا يكرمنا بأطفال، نفضل نحكى لهم على حبنا ده، وإلا هيبقى فيه محضر بحبى ليك على باب قلبك بيخبط، وهيكلبشك، ما هو مفيش مفر من حبي حضرتك!!

أولا: أنا مش واحد صاحبك
مش لازم يا حبيبتى كتير، عشان الكلمة حلاوتها ما تروحش منها، بس مش معنى كده إنك ما تقولهاش خالص، وأحس إنك بتعاملنى كأنى واحد صاحبك!!

ثانيا: حس بيا بقى
يا سلام عليك لما أكون تعبانة ومخنوقة، وألاقيك بتحس بيا وبتكلمنى تتطمن عليا، ما هو حضرتك نصى التانى برضه، يعنى روح واحدة فى جسدين على رأى الفليسوف أرسطو .

ثالثا: في المناسبات
لما يهل علينا هلال شهر رمضان وألاقيك مع كل عام وإنتم بخير، تجيب لى فانوس، مش معنى كده إنى بستغلك، لا أنا بهزر معاك
ومع العيد لازم العيدية برضه ولا إيه.. أقول لك.. خليها رسالة تعيّد بيها عليا.
مش معنى كده إنك تفكر فى دبحى فى العيد الكبير.. لا، أقل من عزومة على فتّة ما تنفعش .
في عيد الحب مش عايزة هابى فالنتين ولا هدية ولا خروجة، كفاية إنك تبقى معايا بإحساسك وروحك.. تبقى طيف حواليا تحسسني إني ملكة الكون كله.
والأحلى بقى يوم عيد ميلادى.. لازم تفاجئني بأي حاجة.. وردة أو حتى ابتسامة منك، تخلينى كده أحس إنى فراشة طايرة فى السما ومالكة الدنيا بين جناحتى.

رابعا: العب على طول في مركز الدفاع
لما حد يفكر يضايقنى ولا حتى يخنق عليا زى حضرتك كده يعنى
ألاقيك تاخدك الجرأة وتروح متخانق معاه، ما أنا عارفة إنى حبيبة قلبك.

خامساً: استحملني يا أخي
لما تبقى مخنوق من شغلك ولا أى حاجة فى الحياة، وأقوم بأجمل واجباتى وأفضل أرخم عليك، ما تعمليش مقموص وزعلان، ما إنت عارف إنى رخمة وما تقدرش تستغنى عن رخامتى، معلش يعنى نحن نختلف عن الآخرين .

سادسا: اوعى تتقل على الرز
ما تفكرش إنك تعمل بالمثل اللي بيقول "اتقل على الرز يستوي"!! لا، ممكن بكل بساطه يتحرق منك، فبلاش نظام التطنيش وعدم الاهتمام، بدل ما الرز يمرر، وعلى فكرة أنا مش زى الرز، أنا زى أى بنت.

سابعا: خد بالك من كل اللي فات
أخيرا وليس آخرا، لو ما عملتش ده كله، أنا بحذرك من أولها كده، خليك حنين ولطيف وصريح وبلاش لف ودوران ولا نظام صمت أبوالهول ولا تعيش دور نزار قبانى المسكين ضحية حبه!
وكل ده عشان نبدأ حياتنا مع بعض على حب وحنّية وخير، وأسلمك قلبى وما نبدأهاش بتحدى وعِند وشغل جنان، مش هناخد منه غير تعب نفسنا ودماغنا، وممكن نكره بعض لا قدّر الله يعنى، بس أنا ما أقدرش أكرهك يا اللى عارفاك من قبل ما أشوفك ولا أقابلك .. تصدق إنك وحشتنى
الرجاء التوقيع على استلام قلبك للمحضر الجميل ده

هههههههههه وياترى المحضر ده على ايد المأذون ولا المحكمه
أخيرا وليس آخرا، لو ما عملتش ده كله، أنا بحذرك من أولها كده، خليك حنين ولطيف وصريح وبلاش لف ودوران ولا نظام صمت أبوالهول ولا تعيش دور نزار قبانى المسكين ضحية حبه!
وحلوه صمت ابو الهول دى معبره

هيه جوازة على ايد مأذون

[ندعوك للتسجيل في المنتدى أو التعريف بنفسك لمعاينة هذه الصورة]

بس شكلها تحت تهديد السلاح

[ندعوك للتسجيل في المنتدى أو التعريف بنفسك لمعاينة هذه الصورة]

او تخليص حق لسه مافيش اسباب واضحه

لما توصلى للاسباب ياريت تنشريها

» احدث اختفاء< ابحث مع اهل الفقيد >